გალაქტიკა NGC 1097-ის მკლავებში

 სამხრეთის ცის სპირალური გალაქტიკა NGC 1097, რომლამდე მანძილი 45 მილიონი სინათლის წლია, ღუმელის თანავარსკვლავედში მდებარეობს. ამ ფერად გამოსახულებაზე მისი ცისფერი მკლავები, მოვარდისფრო ვარსკვლავთწარმომქმნელი უბნებით არის მოფენილი. ისინი, თითქოს, ზედა მარჯვენა მხარეს მდებარე თანამგზავრ პატარა გალაქტიკას შემოჰხვევია, რომელიც დიდის ელვარე ბირთვიდან 40 ათასი სინათლის წლის მანძილზე მდებარეობს. ამასთან ერთად, ფოტოზე დაიმზირება სუსტი ჭავლებიც (“ჯეტი”), რომლებიც მკლავებს იქეთ საკმაოდ შორს ვრცელდება. NGC 1097-ის ოპტიკურ გამოსახულებებზე ოთხი ასეთი ჭავლია აღმოჩენილი. იქსის ფორმის წარმონაქმნის ცენტრი გალაქტიკის ბირთვს ემთხვევა, თუმცა, სავარაუდოდ, ისინი ცენტრიდან არ უნდა ამოდიოდეს. ალბათ, ვარსკვლავთა ნაკადებია, რომლებიც NGC 1097-ის მიერ შორეულ წარსულში სხვა გალაქტიკის მიერთების პროცესში წარმოიქმნა. NGC 1097 სეიფერტის გალაქტიკას წარმოადგენს, რომლის ცენტრშიც ზემასიური შავი ხვრელია. ამ გალატიკაში აინთო ზეახალი SN 2023rve, რომელიც გასულ თვეში აღმოაჩინეს, არაბთა გაერთიანებულ საემიროების ალ ხატიმის ობსერვატორიდან. მოგვიანებით დადგინდა, რომ ეს იყო მასიური ვარსკვლავის სასიკვდილო აფეთქება, რომლის ბირთვი შავ ხვრელად შეილება გადაიქცეს.